Ayub 10: 18 Kénging menapa kawula Paduka kersakaken lair ing donya? Langkung saé saupami kawula pejah sadèrèngipun kasumerepan ing tiyang.
Kalamangsanipun,
kita ngraosaken bab-bab ingkang boten kita pengini. Contonipun nate kula alami,
rikala tanggal 10 Mei 2012, kula sarombongan wangsul saking ngestreni
penahbisan pamulang ing GKJ Japah, ing laladan Kedungjati mobilngguling
wonten ing tegalan. Raosipun kaget, bingung, saha sedih awit wonten sadherek
ingkang patah tulang lengan, katambah mobilipun risak. Kawontenan ingkang
saestu boten dipun pengini.
Ayub ugi nate ngalami bab
ingkang boten dipun pengini inggih punika nandhang sakit. Sinten tiyangipun
ingkang kepengin nandhang sakit? Menika dipun alami dening Ayub, kepara ingkang
dipun alami awrat sanget awit piyambakipun kedah ngadhepi sesakit gudhik ing
sakujur badanipun. Kamangka, satata kapitadosan, piyambakipun sampun pitados
dhumateng Gusti, kanyata taksih
ngraosaken bab ingkang boten nyekecakaken. Pramila lajeng tuwuh
pitakenan ingkang kirang langkung katembungaken, “kenging menapa panguwaos
Paduka kok kados mekaten Gusti?” Menika mratelakaken bilih Ayub ugi sampun nate
ngaosaken bingung bab panguwaosipun Gusti, “menapa menika panguwaos Paduka?”
Sinaosa mekaten, ing tembe wingkingipun, Ayub tansaya ngekahi kapitadosanipun
dhumateng panguwaosipun Gusti, bilih panguwaosipun dadosaken para kagunganipun
ngalami indahing gesang.
Kadospundi kita ngadhepi mawarni-warni bab ingkang boten kita pengini,
kados ingkang kula sarombongan alami? Mbok bilih ndadosaken bingung bab
panguwaosipun Gusti, “kenging menapa kedah mekaten Gusti?” Kita saged nampeni jawaban
nalikanipun enget dhateng Ayub ingkang suwaunipun bingung, ananging
salajengipun tansaya ngekahi kapitadosan dhumateng panguwaosipun Gusti. Panguwaosipun
Gusti mesti ndadosaken kabecikan ing gesang kita, kepara, aosipun nglangkungi
samukawis. Pramila, ing sadengah prekawis ingkang kita alami, pitadosa lan
memujia dumateng Gusti, kados pratelanipun Mazmur 19:9 “Dhawuhé Gusti Allah
kuwi bener, gawé bungahé ati; dhawuhé Allah kuwi adil, madhangi nalar lan
budi.Pangabekti marang Allah, selawasé becik, putusané Allah mesthi bener, adil
ing sekabèhé.”
